Santa Marija Goretti 💐

Santa Marija Goretti twieldet f’Corinaldo, l-Italja, fl-1890. Hi kienet tagħmel parti minn familja fqira ta’ sebat itfal, u għalhekk qatt ma marret skola u ma kinitx taf tikteb u taqra.

Meta kellha madwar disa’ snin, il-familja tagħha marret toqgħod fil-belt ta’ Nettuno, qrib Ruma, fejn sena wara miet missierha. Għal xi żmien, il-familja Goretti kienet taqsam id-dar tagħha ma’ familja oħra. Wieħed mit-tfal tal-familja l-oħra, Alessando Serenelli, li kellu tmintax-il sena, kien spiss iħajjar lil Marija għad-dnub, iżda hi kienet dejjem tiqaflu.

Darba waħda, fil-5 ta’ Lulju tal-1902, waqt li Marija kienet qiegħda tħit, Alessandro mar fuqha u ttanta jieħu kunfidenza magħha. Bħas-soltu, Marija ma beżgħatx tgħidli le u spjegatlu li dak kien dnub kontra l-pjan ta’ Alla. Madankollu, minkejja d-deċiżjoni tagħha, Alessandro ġiegħel lil Marija, u meta ra li baqgħet tirreżistih u bdiet tgħajjat għall-għajnuna, beda jattakkaha b’mod vjolenti.

Dakinhar Marija spiċċat l-isptar fejn it-tobba ħadmu għal sigħat sħaħ biex isalvawlha ħajjitha. Però, sfortunatament Marija mietet l-għada fil-preżenza t’ommha. Qabel ma mietet, hija ħafret lill-Alessandro ta’ dak li kien għamlilha, u esprimiet ix-xewqa tagħha li meta’ jasal iż-żmien tiegħu, huwa wkoll ikun magħha fis-sema.

Wara l-mewt ta’ Marija Alessandro kien ikkundannat tletin sena ħabs. Għal xi żmien, meta kien għadu ma nidimx, hu kien joħlom u jara viżjonijiet ta’ Marija taqta’ l-fjuri u toffrihomlu. Dawn id-dehriet tant laqtu lil Alessandro li ġiegħluh ibiddel ħajtu u jindem. Meta ħareġ mill-ħabs, huwa mar dritt għal għand omm Marija u talabha taħfirlu. Wara dan, huwa daħal ukoll Fratell mal-Patrijiet Kapuċċini.

L-istorja ta’ Marija malajr bdiet tinxtered u wara li bdew isiru l-mirakli għat-talb tagħha, il-Papa Piju XII ikkanonizzaha fil-25 ta’ Lulju tal-1950. Għall-kanonizzazzjoni tagħha attendew iktar minn 250,000 persuna, u fosthom kien hemm ommha, tlieta minn ħutha, u Alessandro ta’ 66 sena li intlemah għarkupptejh jibki dmugħ ta’ ferħ.

---

Verżjoni Video: