San Ġwann il-Battista 💧

San Ġwann il-Battista twieled sitt xhur qabel Ġesù. Missieru kien jismu Żakkarija, u ommu, li kienet ukoll qariba ta’ Marija kien jisimha Eliżabetta.

Wara li l-Arkanġlu Gabriel deher lil Marija u ħabbrilha li hi kienet se tkun omm il-Messija, hu qalilha wkoll li l-qariba tagħha Eliżabetta kien ser ikollha tarbija wkoll. Wara li ġara dan, Marija marret iżżur lil Eliżabetta u hekk kif wasslet, it-tarbija fil-ġuf ta’ Eliżabetta qabżet u ġiet mnaddfa mid-dnub.

Minn età żgħira, San Ġwann għex ħajtu fid-deżert tal-Lhudija fejn prietka u sejjaħ lill-irġiel u lin-nisa biex jindmu bi tħejjija għall-miġja ta’ Ġesù. San Ġwann kien ikun ħdejn ix-xmara Ġordan jgħammed, u meta darba waħda ra lil Ġesù riesaq lejh, urieh lin-nies u qalilhom li kien il-Ħaruf ta’ Alla li kien mibgħut biex ineħħi d-dnubiet tad-dinja. L-att ċentrali ta’ Ġwanni l-Battista kien li jgħammed lil Ġesù, u allavolja għal bidu ma riedx jgħammdu għax Ġesù kien iben Alla u ma kellux dnub, xorta waħda sema’ minnu u għammdu.

Skont it-Testment il-Ġdid, is-Sultan Erodi kien tefa’ lil Ġwanni l-Battista l-ħabs u eventwalment anki qatlu bil-qtugħ tar-ras wara li Ġwanni ċanfru talli kien iddivorzja lil martu b’mod illegali biex ikollu relazzjoni ma’ Erodija, il-mara ta’ ħuh. Il-festa tiegħu hija ċċelebrata fil-ġurnata li ħafna jaħsbu li twieled, l-24 ta’ Ġunju.

---

Verżjoni Video:

https://www.youtube.com/watch?v=834fR6ZnAbw