San Ġwann Henry Newman 📖

Ġwanni Henry Newman twieled fil-21 ta’ Frar tal-1801, f’Londra. Huwa kien il-kbir fost sitt aħwa, u kien ġej min familja Anglikana ta’ klassi medja. Missieru kien bankier, u ommu kienet ġejja minn sfond Franċiż-protestant, għalhekk minn età żgħira Newman kien espost għal sens ta’ dixxiplina u reliġjożità serji.

Ta’ ħmistax-il sena, Newman esperjenza konverżjoni reliġjuża li ħalliet impatt kbir fuq il-ħajja tiegħu. Huwa ddeskriva dan il-mument bħala dak li wasslu biex jemmen bis-sħiħ f’Alla u fid-dinja spiritwali. Fl-1817, huwa beda jistudja fil-Kulleġġ tat-Trinità, f’Oxford, fejn ħarġet ċara l-intelliġenza akkademika tiegħu, u aktar tard fl-1822 huwa ġie elett bħala membru importanti tal-Kulleġġ Oriel, pożizzjoni li poġġietu fil-qalba ta’ dak li kien qiegħed jiġri f’Oxford.

Newman ġie ordnat djaknu Anglikan fl-1824, u qassis fl-1825. Huwa sar għalliem fil-Kulleġġ Oriel, u aktar tard Vigarju tal-Knisja Universitarja tal-Verġni Marija f’Oxford. Hawnhekk, huwa kiseb reputazzjoni għall-ippridkar profond, serju, u spiritwali intens tiegħu. Matul it-tletinijiet, Newman kien figura ewlenija f’dak li sar magħruf bħala l-Moviment ta’ Oxford. Flimkien ma’ figuri bħal John Keble u Edward Pusey, huwa fittex li jqajjem mill-ġdid il-wirt Kattoliku tal-Knisja tal-Ingilterra, billi enfasizza s-suċċessjoni appostolika, is-sagramenti, u l-kontinwità tal-Knisja tal-bidu.

Fost l-oħrajn, huwa kien l-awtur ewlieni tal-fuljetti teoloġiċi ‘Tracts for the Times’ li argumentaw favur il-Knisja tal-Ingilterra bħala fergħa vera tal-Knisja Kattolika. Madanakollu, il-moviment beda kull ma jmur isir aktar kontroversjali, speċjalment wara d-disgħin pubblikazzjoni li pprovat tinterpreta d-dutturi Anglikani bħala kompatibbli mat-tagħlim Kattoliku Ruman.

Wara din il-pubblikazzjoni, Newman beda jiddibuta jekk il-Knisja tal-Ingilterra setgħetx verament tgħid li kellha kontinwità mal-Knisja bikrija, u għalhekk għażel li jirtira mill-ħajja pubblika. Huwa mar Littlemore, viċin Oxford, fejn għex ħajja ta’ talb, studju u riflessjoni. Matul dan il-perjodu huwa s-studja l-kitbiet tal-Missirijiet tal-Knisja u l-istorja tad-duttrina Nisranija. Dan il-xogħol laħaq il-qofol tiegħu meta għaraf li d-duttrina Nisranija tiżviluppa b’mod natural maż-żmien, aktar milli tibqa statika.

Fl-1845, konvint li l-Knisja Kattolika Rumana biss kienet tirrappreżenta bis-sħiħ il-Knisja li waqqaf Kristu, Newman ingħaqad mal-Knisja Kattolika. Din id-deċiżjoni swietlu ħbiberiji, ir-reputazzjoni, u l-karriera tiegħu, iżda huwa segwiha xorta b’fidi kbira. Huwa ġie ordnat qassis Kattoliku fl-1847, f’Ruma’, fejn ingħaqad mal-Oratorju ta’ San Filippu Neri, komunità ta’ qassisin ddedikati għat-talb, l-ippridkar, u l-ħidma pastorali. Meta rritorna lura l-Ingilterra, Newman waqqaf l-Oratorju ta’ Birmingham, li sar id-dar tiegħu għal kumplament ta’ ħajtu. Minkejja li l-ħajja Kattolika ma kinitx faċli fl-Ingilterra, huwa ddedika ruħu għall-ippridkar, il-kitba, u l-gwida spiritwali.

Fl-1854, bħala risposta għall-akkużi ta’ diżonesta li kien jaffaċċja, huwa ppublika l-bijografija spiritwali tiegħu, ‘Apologia Pro Vita Sua’. Dan ix-xogħol intlaqa’ tajjeb ħafna mill-pubbliku, tant li rnexxielu jerġa’ jikseb ir-reputazzjoni pubblika tiegħu u juri s-sinċerità, l-umiltà u l-integrità tiegħu. Newman kompla jikteb dwar it-teoloġija, l-edukazzjoni, u l-kuxjenza, u fost ix-xogħlijiet tiegħu tul dan il-perjodu nsibu ‘The Grammar of Assent’, li jesplora kif il-bnedmin jaslu għat-twemmin reliġjuż, u għadu relevanti sal-lum.

Fl-1879, il-Papa Ljun XIII irrikonoxxa l-importanza teoloġika ta’ Newman billi ħatru kardinal, u hawnhekk huwa għażel il-motto “Cor ad cor loquitur” (“Qalb titkellem ma’ qalb”), li jirrifletti l-approċċ tiegħu lejn il-fidi. Minkejja dan l-irwol importanti, huwa baqa jgħix ħajja sempliċi u devota fl-Oratorju.

Ġwanni Henry Newman miet fil-paċi fid-9 ta’ Ottubru tal-1890, f’Birmingham. Huwa ġie beatifikat fl-2010 mill-Papa Benedittu XVI, u aktar tard fl-2019 il-Papa Franġisku kkanonizzah formalment bħala qaddis tal-Knisja Kattolika.

Il-festa tiegħu hija ċċelebrata fil-5 ta’ Jannar, u huwa magħruf ukoll bħala wieħed mill-qaddisin patruni tal-konvertiti, it-teologi, u l-istudjużi.