San Nikola 🎁

San Nikola twieled fit-tielet seklu f’Patara, illum parti mit-Turkija. Il-ġenituri tiegħu kienu sinjuri u Insara devoti li dejjem rabbewh fil-fidi. Iżda huma mietu waqt epidemija meta Nikola kien għadu tifel, u għalhekk huwa wiret ammont sostanzjali minn ġidhom. Minflok ma uża l-flus li wiret għall-ġid personali u żammhom għalih, huwa ddeċieda li jiddedika ħajtu biex jaqdi lil Alla u jgħin lil dawk fil-bżonn.

Wara l-mewt tal-ġenituri tiegħu, San Nikola mar joqgħod ma’ zijuh, li kien ukoll isqof f’Patara. Zijuh ħa ħsiebu u kompla jmexxih fit-triq tal-fidi billi ħeġġu jiddedika l-ħin tiegħu għat-talb u għall-qari tal-Iskrittura Mqaddsa.  Meta kiber, Nikola sar saċerdot u eventwalment inħatar ukoll Isqof ta’ Mira, fejn kien magħruf għat-tjubija u l-ġenerożità tiegħu.

Huwa kien magħruf ukoll għall-imħabba tiegħu lejn it-tfal u għall-karità li kien jagħmel bil-moħbi. Waħda mill-aktar stejjer famużi dwaru hija meta għen lil tliet aħwa foqra li ma kellhomx biżżejjed flus biex jiżżewġu. Meta sar jaf bihom, San Nikola xtaq jgħinhom u għalhekk jingħad li b’mod sigriet fuq tliet okkażjonijiet separati, huwa poġġa xi boroż mimlijin deheb fil-kalzetti tagħhom li kienu qegħdin jinxfu ħdejn in-nar. Ħafna jgħidu li din il-ġrajja hija l-oriġini tat-tradizzjoni li jiddendlu l-kalzetti għar-rigali fil-Milied.

Huwa magħruf li San Nikola għamel ukoll diversi mirakli. Fost l-aktar popolari nsibu l-miraklu ta’ meta waqqaf maltempata u salva numru ta’ persuni. Huwa kien qiegħed jivjaġġa fuq vapur meta qamet maltempata kbira li hedded il-ħajja ta’ dawk kollha li kienu abbord. Il-baħrin u l-passiġġieri l-oħra kienu mbeżżgħin u daru lejn San Nikola għall-għajnuna. Huwa talab għas-sigurtà tagħhom, u b’riżultat ta’ dan, il-maltempata kkalmat u l-vapur ġie ggwidat mingħajr periklu lejn id-destinazzjoni tiegħu.

San Nikola miet madwar is-sena 343 fis-6 ta’ Diċembru f’Mira. Huwa ġie midfun fil-knisja ta’ Mira stess, iżda fl-1087, grupp ta’ baħrin Taljani ħadu r-relikwi ta’ San Nikola minn lejn Bari fejn għadhom jinsabu sal-lum il-ġurnata fil-Bażilika ta’ San Nikola.

Il-festa tiegħu hija ċċelebrata kull sena fis-6 ta’ Diċembru, u huwa magħruf ukoll bħala l-qaddis patrun tat-tfal, tal-baħħara, u tan-negozzjanti.