San Mark 🦁

Ġwann Mark twieled fl-ewwel seklu, aktarx fil-belt ta’ Ġerusalemm. Huwa magħruf bħala wieħed mill-erba’ Evnġelisti li ddokumentaw u kitbu l-ħajja, t-tagħlim, u s-sagrifiċċji ta’ Ġesù fit-Testment il-Ġdid. San Mark ma kienx wieħed mill-Appostli oriġinali, u x’aktarx qatt ma ra lil Ġesù iżda kien parti mill-ewwel komunitajiet Insara.

San Mark huwa assoċjat mill-qrib ma’ San Pietru, li ħafna jqisuh bħala l-parrinu spiritwali tiegħu. Kitbiet Kristjni tal-bidu jissuġġerixxu li Mark serva bħala s-segretarju ta’ Pietru, u infatti, l-Evanġelju ta’ San Mark huwa maħsub li jirrifletti t-tagħlim u l-priedki ta’ Pietru.

Huwa vjaġġa wkoll ma’ San Pawl u San Barnaba fl-ewwel vjaġġ missjunarju tagħhom, iżda f’xi punt telaqhum u rritorna lura Ġerusalemm. Din id-deċiżjoni wasslet għal nuqqa ta’ qbil bejn Pawlu u Barnaba, li għal xi żmien infirdu fi triqat differenti. Wara dan in-nuqqas ta’ qbil, Mark reġa ngħaqad ma’ Barnaba, u flimkien komplew bil-ħidma misjunarja tagħhom f’Ċipru. It-tradizzjoni ssostni li Mark kellu rwol importanti fit-tixrid tal-Kristjaneżmu f’dan ir-reġjun. It-tradizzjoni tgħid ukoll li Mark vvjaġġaw wkoll lejn l-Eġittu, fejn waqqaf il-knisja u sar ukoll l-ewwel isqof ta’ Lixandra.

San Mark miet martri f’Lixandra, madwar is-sena 68WK. Huwa maħsub li kien imkaxkar fit-toroq minn folla pagani li opponew it-tagħlim tiegħu. Eventwalment inqatel, u l-ġisem tiegħu ġie midfun f’Lixandra stess, fejn maż-żmien il-qabar tiegħu sar sit ta’ pellegrinaġġ popolari fost l-Insara.

L-Evanġelju ta’ San Mark huwa l-iqsar, u l-eqdem Evanġelju, miktub madwar is-snin 60-70 WK. Is-simbolu tiegħu huwa iljun, li jirrapreżenta l-kuraġġ u s-saħħa. Dan is-simbolu joriġina mis-siltiet tal-bidu tal-Evanġelju tiegħu, fejn jiddeskrivi lil Ġwanni l-Battista bħala “leħen ta’ wieħed jgħajjat fid-deżert” bħal iljun.

Il-festa tiegħu hija ċċelebrata kull sena fil-25 ta’ April, u huwa magħruf bħala l-qaddis patrun ta’ Venezja, tal-Eġittu, u tan-nutara.