San Filippu 🍞

San Filippu l-appostlu kien minn Betsajda, raħal mal-baħar tal-Galilija li fih għexu wkoll Pietru u Indrì. Allavolja kien Lhudi, ismu li kien ġej mill-Grieg jissuġġerixxi li kien influwenzat mill-kultura Griega, li aktar tard għenitu biex ixerred l-Evanġelju lil dawk li ma kinux Lhud.

Filippu kien wieħed mill-ewwel appostli msejjaħ personalment minn Ġesu. Fl-Evanġelju ta’ San Ġwann insibu miktub li Ġesù sabu u qallu “imxi warajja”, u mill-ewwel, Filippu aċċetta u mar jgħid lil ħabib tiegħu Bartilmew, li mar miegħu jara lil Ġesù u ġie msejjaħ biex isir appostlu wkoll. Fil-ħajja pubblika ta’ Ġesù, Filippu jidher f’diversi mumenti, fosthom meta Ġesù tema’ mal-ħamest elef ruħ, u meta fl-aħħar ċena talbu biex jurihom lill-Alla l-Missier.

Wara l-qawmien mill-imwiet ta’ Ġesù u l-inżul tal-Ispirtu s-Santu fuq l-appostli, Filippu vvjaġġa bħala missjunarju u priedka f’postijiet bħal Scythia u Phrygia fejn ikkonvera ħafna nies u għamel ukoll xi mirakli. Eventwalment spiċċa f’Hierapolis, illum it-Turkija, fejn ġie maqtul martri. Wisq probabli ġie midfun f’Hierapolis stess, u fl-2011, xi arkeologi sostnew li kienu sabu l-qabar tiegħu. 

Il-ħajja tiegħu tfakkarna fl-importanza li nafdaw f’Ġesù, u li nressqu lil ħaddieħor eqreb lejh, kif għamel hu. Il-festa ta’ San Filippu hija ċċelebrata fit-3 ta’ Mejju, u huwa magħruf bħala qaddis patrun tal-Urugwaj, tal-furnara, u ta’ dawk li jagħmlu u jsewwu l-kpiepel.