It-Twelid ta' Sidna Ġesù Kristu: Quddiesa tas-Sebħ ⭐

---

---

Dan il-qari huwa għall-quddiesa tas-sebħ. Ara wkoll:

I 🌙 Quddiesa ta' Nofsillejl: https://ghalikukoll.wixsite.com/home/post/it-twelid-ta-sidna-ġesù-kristu-quddiesa-ta-nofsillejl-1

I 👼 Quddiesa ta' Binhar: https://ghalikukoll.wixsite.com/home/post/it-twelid-ta-sidna-ġesù-kristu-quddiesa-ta-binhar-1

📗 L-Ewwel Qari:

Qari mill-Ktieb tal-Profeta Isaija

(Isaija 62: 11-12)

Araw, il-Mulej isamma’ leħnu sa truf l-art:

“Għidu lil bint Sijon:

Arah, ġej is-salvatur tiegħek!

Arah bil-prezz f’idu u l-ħlas quddiemu.

U jibdew isejħulhom Poplu qaddis,

il-Mifdijin tal-Mulej.

U lilek isejħulek l-Imfittxija,

il-Belt qatt abbandunata”.

Il-Kelma tal-Mulej

R/. Inroddu Ħajr lil Alla

📘 Salm Responsorjali:    

R/. Illum jiddi fuqna d-dawl, għax twildilna l-Mulej

(Salm 97: 1, 6, 11-12)

Il-Mulej isaltan! Ħa taqbeż l-art bil-ferħ,

u jifirħu l-ħafna gżejjer!

Ixandru s-smewwiet il-ġustizzja tiegħu;

jaraw il-popli kollha s-sebħ tiegħu. R/.

Ifeġġ id-dawl fuq il-ġust,

u l-hena għal qalb in-nies sewwa.

Ifirħu, ġusti, fil-Mulej,

u faħħru l-isem qaddis tiegħu. R/.

---

Reklam

Agħfas fuq ir-ritratt biex tikkuntatjana u tordna dawn il-kartolini.

---

📙 It-Tieni Qari:

Qari mill-Ittra ta' San Pawl Appostlu lil Titu

(Titu 3: 4-7)

Għażiż, meta feġġet it-tjieba ta’ Alla, Salvatur tagħna,

u l-imħabba tiegħu għall-bnedmin,

hu salvana bil-ħasil ta’ twelid ġdid u t-tiġdid tal-Ispirtu s-Santu,

mhux minħabba l-opri tajba li stajna għamilna aħna,

iżda minħabba l-ħniena tiegħu.

Dan l-Ispirtu hu xerrdu bil-kotra fuqna

b’Ġesù Kristu, is-Salvatur tagħna,

biex bis-saħħa tal-grazzja tiegħu

nitqaddsu u nsiru werrieta tal-ħajja ta’ dejjem

skont it-tama li għandna.

Il-Kelma tal-Mulej

R/. Inroddu Ħajr lil Alla

📕 Akklamazzjoni Qabel l-Evanġelju:

(Luqa 2: 14)

Hallelujah. R/. Hallelujah.

Glorja lil Alla fl-ogħla tas-smewwiet,

u sliem fl-art lill-bnedmin li jogħġbu lilu!

R/. Hallelujah.

📕 L-Evanġelju:  

Qari mill-Evanġelju skont San Luqa

(Luqa 2: 15-20)

Meta mbagħad l-anġli ħallewhom u telgħu s-sema, ir-rgħajja bdew jgħidu lil xulxin: “Ejjew immorru Betlehem ħa naraw x’ġara kif għarrafna l-Mulej”.

Marru mela jgħaġġlu, u sabu lil Marija u lil Ġużeppi bit-tarbija mimduda f’maxtura. Kif raw dan, bdew jgħarrfu b’kulma kien intqal lilhom dwar dik it-tarbija, u kull min semagħhom baqa’ mistagħġeb b’dak li qalulhom ir-rgħajja. Marija, min-naħa tagħha, baqgħet tgħożż f’qalbha dawn il-ħwejjeġ kollha u taħseb fuqhom bejnha u bejn ruħha. Ir-rgħajja mbagħad reġgħu lura, isebbħu u jfaħħru lil Alla għal kulma kienu raw u semgħu, kif l-anġlu kien qalilhom.

Il-Kelma tal-Mulej

R/. Tifħir lilek Kristu

---

Reklam

Agħfas fuq ir-ritratt biex tikkuntatjana u tordna dan il-ktieb ta' attivitajiet.

---